“အိုပယ်” ဆိုတာ ကျွန်တော်ကြည့်ဖူးတဲ့ ဇာတ်ကားတစ်ကားရဲ့ အမည်ပါ။ ဒီကားကို မကြည့်ခင်တုန်းက နာမည်လေးက ကိုရီးယားနာမည်လို့ ထင်စရာလေးပါ။ အမှန်တော့ ဇာတ်ကားလေးက ပညာပေးကားလေးပါ။ အသက်အရွယ် အိုမင်းလာတဲ့ မိဘများကို သားသမီးများက မိဘရဲ့ကျေးဇူးကိုမသိဘဲ စွန့်ပစ်ထားတာကို ရိုက်ကူးထားတဲ့ ကားလေးဖြစ်ပါတယ်။ ဖ၀ါးလက်နှစ်လုံး ဖခုံးလက်နှစ်သစ်ကတည်းက လူဖြစ်အောင် ကျွေးမွေးစောင့်ရှောက်ခဲ့တဲ့ မိဘများကို အရွယ်ရောက် ပညာစုံ အတောင်စုံတဲ့အခါ အိုမင်းရင့်ရော်လာတဲ့ မိဘများကို လစ်လူရှု့ထားပေမယ့် မိဘမေတ္တာကတော့ သားသမီးအပေါ် ဘယ်တော့မှ ပျက်ပြယ်မသွားပါဘူး။ တောင်းဆိုးပလုံးဆိုးကိုသာ ပစ်ရိုးထုံးစံရှိပြီး သားဆိုးသမီးဆိုးကိုတော့ ပစ်ရိုးထုံးစံမရှိပါဘူး။ ကျွန်တော်တို့လို ပုထုဇဉ်လူသားတွေအတွက် မိဘကျေဇူးကို ကျေအောင်ဆပ်နိုင်ဖို့ မလွယ်ပါဘူး။ ဒါကြောင့် အသက်အရွယ် အိုမင်းလာတဲ့ မိဘများကို ငြူဆူမှုမရှိဘဲ ဘုရားရိပ်တရားရိပ်မှာ နားခိုးပြီးသူတို့ရဲ့ ဘ၀ကို ပျော်ရွင်အေးချမ်းစွာ ဖြင့်ဖြတ်သန်းနိုင်အောင် ဆောင်ရွက်ရမည်မှာ ကျွန်တော်တို့အားလုံးရဲ့ သားသမီးဝတ္တရားများသာ ဖြစ်ပါတယ်။ ဒီဇာတ်ကားထဲမှာပါတဲ့ “ငါအိုသွားတဲ့အခါ” ၂၀၀၄ခုနှစ် (၁၂) လပိုင်း (၆) ရက်နေ့ ထုတ်ဆောင်ပါးလေးကို နှစ်သက်၍ မူရင်းအတိုင်းပြန်လည် ဖော်ပြလိုက်ပါတယ်။
“ငါအိုသွားတဲ့အခါ”
- ငါအိုသွားတဲ့အခါ ငါဟာအရင်က ငါမဟုတ်တော့ဘူး၊ ငါ့ကိုနားလည်ပေးပါ၊ စိတ်ရှည်ရှည်ထား ဆက်ဆံပေးပါ။
- ချိနဲ့နဲ့လက်တွေနဲ့ ထမင်းဟင်းတွေ အင်္ကျီပေါ် လောင်းမိတဲ့အခါ၊ ဖိနပ်ကြိုးတွေ ချည်ဖို့ မေ့သွားတဲ့အခါ၊ ငါ့ကိုမရွံပါနဲ့၊ ငယ်ငယ်တုန်းက ငါသင်ပေးခဲ့တာတွေကို ကျေးဇူးပြုပြီး သတိရပေးပါ။
- အပ်ကြောင်းထပ်မက ပြောဖူးတဲ့စကားတွေကို ငါပြန်ပြောမိတဲ့အခါ စကားမဖြတ်ဘဲ ကျေးဇူးပြုပြီး နားထောင်ပေးပါ၊ ငယ်ငယ်တုန်းက အိပ်ရာဝင်တိုင်း တစ်ထောင့်တည ပုံပြင်တွေကို မရိုးအောင်ပြောရင်း ငါချော့သိပ်ခဲ့ဖူးတာတွေကို သတိရပေးပါ။
- မလှုပ်ရှားနိုင်လို့ ရေချိုးဖို့ အကူအညီလိုတဲ့အခါ ငါ့ကိုမငြိုငြင်ပါနဲ့၊ ငယ်ငယ်တုန်းက ချော့တစ်လှည့် ခြောက်တစ်ခါ ရေချိုးပေးခဲ့ဖူးတဲ့ ပုံရိပ်လေးကို မြင်ယောင်ပေးပါ။
- ခေတ်သစ်၊ နည်းပညာသစ်တွေကို မသိနားမလည်ခဲ့ရင် ငါ့ကိုမလှောင်ပါနဲ့၊ ငယ်ငယ်တုန်းက “ဘာကြောင့်” ဆိုတဲ့ မေးခွန်းတိုင်းကို စိတ်ရှည်စွာ ငါပြန်ဖြေခဲ့တာတွေကို သတိရပေးပါ။
- စိတ်သွားတိုင်း ကိုယ်မပါနွမ်းလျပြီး လမ်းမလျောက်နိုင်တဲ့အခါ ခွန်အားပါတဲ့ လက်တစ်စုံနဲ့ ငါကိုတွဲကူပေးပါ၊ လမ်းလျောက်သင်စ အရွယ်တုန်းက တစ်လှမ်းချင်း လှမ်းလျောက်ကျင့်ပေးခဲ့ဖူးတာကို ကျေးဇူးပြုပြီး သတိရပေးပါ။
- အသက်ကြီးလာလို့ စကားပြောရာမှာ ရှေ့နောက်မညီဘဲ အကြောင်းအရာတွေကို ငါမေ့သွားတဲ့အခါ အချိန်ပေးပြီး စဉ်းစားခွင့်ပေးပါ၊ စကားအကြောင်းအရာတွေက ငါ့အတွက် အရေးမကြီးပါဘူး။ ဘေးကနေ ငါပြောသမျှကို နားထောင်ပေးရင် ကျေနပ်ပါပြီ။
- တစ်နေ့ထက်တစ်နေ့ အိုစာသွားတဲ့ ငါ့ကိုကြည့်ပြီး ၀မ်းမနည်းပါနဲ့၊ နားလည်ပေးပါ၊ အားပေးပါ၊ အရင်တုန်းက လူ့ဘ၀ တက်လမ်းအတွက် ငါလမ်းညွန်ခဲ့သလို အခုအချိန်မှာ ငါ့ဘ၀နောက်ဆုံးအချိန်တွေ အတွက်အဖော်ပြုပေးပါ။ အချစ်နဲ့ အေးမျှမှုတွေကို ငါပြုံးပြုံးလေးလက်ခံမှာပါ၊ အဲဒီအပြုံးတွေထဲမှာ မဆုံးတဲ့ ငါ့မေတ္တာတွေ တွေ့ရမှာပါ။
0 comments:
Post a Comment